“Төрийн одонт Алдарт ээжүүд”
Сумын ИТХ, ЗДТГ-аас “Эх үрсийн баяр”-ыг тохиолдуулан “Төрийн одонт - Алдарт ээжүүд” баярын үйл ажиллагаа зохион байгуулж 120 гаруй эхчүүд хамрагдав. Баярын энэ өдөр сумын ИТХ-ын Тэргүүлэгчдийн 2019 оны 6/21 дүгээр тогтоолоор өндөр настан, 1973-1977 онуудад сумын иргэдээ төлөөлөн АИХ-ын депутатаар сонгогдож байсан Ц.Зулзага гуайг сумын “ХҮНДЭТ ИРГЭН”-ээр тодруулан цол тэмдгийг гардууллаа. Ц.Зулзага гуай сумын 4 дэх хүндэт иргэн болж байгаа бөгөөд хамгийн анхны эмэгтэй "Хүндэт иргэн"-ээр тодорч байгаа юм.
Мөн Алдарт эхийн 2-р зэргийн одонгийн болзол хангасан Б.Амгаланцэцэг, Г.Ундармаа, М.Сэлэнгэ нар одонгоо гардан авлаа.
Алдарт эхийн одонт ээжүүдээс 8 төрлөөр ээжүүдээ алдаршууллаа. Үүнд:
- 91 настай А.Долгорсүрэн гуай – сумын “ӨНДӨР ЭЭЖ”
- 25 настай хамгийн залуу ээж Б.Амгаланцэцэг – ЯРУУ ЭЭЖ
- 2 удаа дараалан ихэр хүүхэд төрүүлсэн Г.Наранзул- ИХЭР ЗАЯАТ ЭЭЖ
- 13 хүүхэд төрүүлж өсгөсөн У.Батаа – ӨНӨР ЭЭЖ
- Эрдэнэ ноён Гэгээнтнийг төрүүлсэн Б.Өргөнцагаан – ГЭГЭЭН ЭЭЖ
- 8 хүүгээ эр цэргийн албанд мордуулж эх орноо мануулсан С.Гаа – ӨРЛӨГ ЭЭЖ
- Өөрийн 10 хүүхдээс гадна бусдын олон үрсийг ангир уургаараа тэжээсэн Л.Ханд – СҮҮН ЭЭЖ
- 2 хүү нь улсын аварга малчин, өөрөө аваргын гэргий С.Цэрмаа- ХҮНДЭТ ЭЭЖ –ээр өргөмжлөн тус тус алдаршууллаа.
Сумын нийт эмэгтэйчүүд, эхчүүддээ аз жаргал, энэ хорвоогийн хамгийн сайн сайхан бүхнийг хүсье.
Монголын үрс маш олон болтугай.
